Сондай-ақ намазда жамағатқа имам болу, азан мен қамат айту да ер кісілердің міндеті. Ал намазға тұрғанда жүз бен қолдың саусақтарынан білезікке дейінгі жерінен басқа бүкіл денесін толық жауып тұру әйелдердің міндеті. Оның тысындағы намаз амалдарының барлығы дерлік ер кісілер мен әйелдерге ортақ міндеттер. Дегенмен сол амалдардың атқарылуында ер кісілер мен әйелдердің дене болмысы мен жаратылысына қарай айырмашылықтары бар. Айталық, әйелдер қолды тәкбірге көтергенде, иықтарына туралап қана көтереді. Ер адам екі қолын екі құлағының деңгейіне көтереді.
Қиямда ер кісі қол байлау үшін бас бармағымен және шынашағымен сол қолының білезігін орап және қалған үш саусағын білегінің үстіне жабыстырып, осы бейнеде кіндігінің астына қояды.Әйел кісі оң қолының алақанын сол қолының сыртына қойып, омырауына перде етіп, кеудесіне қояды.
Ерлер кейбір намазды дауыстап оқиды, ал әйелдер барлық намазды іштей оқиды, бұл жайында Құран аяттары мен хадистер баршылық.
Рукуғта әйел қолдың саусақтарының арасын ашпайды, керісінше жинақы күйінде тізесінің үстіне қояды және рукуғта сәл ғана иіледі. Ал еркісілер саусақ араларын ашып, екі қолды екі тізеге қою және шынтақтарды екі бүйірден көтеріңкі ұстайды. Арқаны бүкпейді. Аяқты бүкпей тік ұстайды.
Ер кісілер сәжде жасағанда, ішті көтереді, шынтақты жерге тигізбейді. Әйел кісілердің шынтағы жерге де, денесіне де тиіп тұрады. Олар ішті көтермейді. Бұл олардың намазда да жабық күйде тұратындығын байқатады.
Намазда отырғанда, ер кісілер сол аяққа салмақ салып отырады, оң аяқтарының ұшын тік қояды, ал әйелдер сол жамбасына отырып аяқтарының ұшын оң жаққа жатқызады.
Қорыта келгенде, ер кісі мен әйел кісілерде намаздың парыздары мен уәжіптерін орындауда ешқандай айырмашылық жоқ, тек кейбір қимылдарда ғана айырмашылықтар кездеседі. Бірақ бұларды орындау я орындамау намазды бұзбайды. Бұл жалпы әйел мен ер кісінің жаратылыстарына сай белгіленген қимылдар.