Намазда кіші немесе үлкен дәреттің бұзылуы, жел шығу, мұрны қанау немесе аузына құсық келу секілді себептерге байланысты еркінен тыс дәреті бұзылған жағдайда адамның дәреті бұзылса да, намазы бұзылмайды. Мұндай жағдайда сөйлеместен, дүниелік нәрселер айтпай, намазға қатысы жоқ іс-әрекет жасамастан, ең жақын жерден дәрет алып, намазын келген жерінен ары қарай жалғастыра алады. Егер намазды жалғыз оқыған болса сол дәрет алған жерде немесе алдында намаз оқып тұрған жеріне барып намазын толықтыра алады. Ал егер жамағатпен оқыған болса, сол жамағатпен оқыған жеріне барып намазын орындайды. Жамағат намазды бітірген болса, жеке өзі қалған рәкаттарды толықтырады.
Айша анамыздан жеткен хадисте Алла елшісі (с.а.с.): «Кімде-кім құсса, мәзи шықса немесе мұрны қанаса дереу барып дәрет алсын. Сонан соң (сөйлеместен), намазын тоқтаған жерінен жалғастырсын», (Бәйһақи, Сүнән) – деген.
Жамағатқа намаз оқытып жатқан имамның дәреті еркінен тыс бұзылған жағдайда өз орнына сапта тұрған біреуді тұрғызады. Имамның орнына өткен кісі намазды ары қарай жалғастырады. Бұлай жасаудың дұрыс екендігіне мұсылман ғұламалары бір ауыздан келіскен. Мысалы, жамағатқа намаз оқытып тұрған имамның кенеттен мұрны қанаса, жел шықса, дәреті бұзылады. Мұндай жағдайда имам жамағаттан имамдыққа лайықтырақ біреуін ишаратпен немесе киімінен тартып михрабқа шығарып, намазды жалғастыру үшін өз орнына тұрғызады. Шыққан кісі намазды ары қарай жалғастырып, намаздың қалған бөлігін толықтырады. Егер имам дәреті бұзылғаннан кейін, орнына жамағаттан біреуді қоймай, мешіттен шықса немесе намаз оқитын жерден алыстап кетсе, жамағаттың намазы бұзылған болып саналады.
Сондықтан намазда имамның дәреті бұзылса, өз орнына намазды әрі жалғастыруы үшін бірінші саптан орынбасар шығаруына болады. Имам дәреті бұзылып орнына біреуді қоятын болса, өз орнынан артқа шегініп, қандай да бір келеңсіз жағдай болғанын қимылмен білдіріп (мыс: мұрны қанағандай болып) бірінші сапта тұрғандардың бірін киімінен тартып, орнына шығарады. Орынбасар намазды имамның тоқтаған жерінен жалғастырады. Имам сап шетінде ашық жер болса, сол жерден, ал болмаса, сап арасынан өтіп, дәрет алып келеді.
Ханафи мәзһабы бойынша намаздың соңғы отырысында «әт-тахият» оқитындай мөлшерде отырғаннан кейін еркінен тыс дәрет бұзылса, намазы жарамды болып есептеледі.