Өмірбаяны
Қ. А. Ясауи атындағы Халықаралық қазақ-түрік университетінің шығыстану факультетін «Философ-дінтанушы және араб тілі оқытушысы» мамандығы бойынша бітірген. Дінтану саласы бойынша магистратура және докторантурада оқыған.
1995 жылдан 2003 жылға дейін өзі түлеп ұшқан ЖОО-да ғылыми қызметкерліктен бастап, университет Президентінің көмекшісі лауазымына дейін көтерілді. 2003-2005 жылдары аталған университеттің «Дінтану» кафедрасының меңгерушісі қызметін атқарған.
Мемлекетіміздің дін саласындағы саясатын жетілдіру жолында жинаған тәжірибесі де жеткілікті. Атап айтқанда, 2006-2009 жылдар аралығында ҚР Әділет министрлігіне қарасты Дін істері комитетінде бас маман, І санаттағы сарапшы, бас сарапшы лауазымында мемлекеттік қызметтерде болған. 2010 жылы ҚР Мәдениет министрлігі Діни істер комитетінің Діни бірлестіктермен байланыстар басқармасының бастығы қызметін атқарған.
2010- 2013 жылдары аралығында еліміздегі ислам дінінің өсіп-өркендеуі жолында көптеген жұмыстарға өз үлесін қосқан. Оның ішінде, «Ислам мәдениеті мен білімін қолдау қоры» корпоративтік қорының атқарушы директоры, Қазақстан мұсылмандары діни басқармасы аппаратының басшысы, Қазақстан мұсылмандары діни басқармасы ғылыми сараптау және талдау бөлімінің меңгерушісі лауазымдарында болды.
2013 жылдың маусым айында мемлекеттік қызметке қайта оралып, ҚР Дін істері агенттігінің Конфессияаралық қатынастар департаменті Исламдық діни бірлестіктермен байланыстар басқармасының бас сарапшысы қызметіне тағайындалды.
Қазіргі уақытта ҚР Дін істері агенттігі Исламдық діни бірлестіктермен байланыстар басқармасының басшысы қызметін атқаруда.
Арнау сөзі
Сәлеметсіздер ме, құрметті оқырман қауым! Бүгінгідей жағдайда діни ахуалды дұрыс түсініп, тура жолды таба білу қай-қайсымыз үшін де маңызды болып отыр. Осы ретте Сіз бен біздің жалған діни ағымдардың жетегінде құрбан болып кетпеуіміз үшін діни сауаттылығымызды арттыра түсуіміз қажет.
Адам баласына нендей зауал туса да, ол - сауатсыздықтан. Егер Сіз исламды дұрыс таныған болсаңыз, онда бүгінгі заман тудырған лаңкестіктен, діни экстремизмнен, жат әрекетті ұстын еткен топтардан бойыңызды аулақ салар едіңіз. Адасып, ата-бабаларымыз ұстанған мұсылмандықты дұрыс зерделемей бұрыс ағымға кетіп жатқандар өкінішке орай қоғамымызда бар. Теріс жолға кетіп жатқан және оны білместікпен таңдаған азаматтар қауіпті топтың құрамына кіргеннен кейін ғана оның ішкі сырына қанығып мың пұшайман болады.
Сондықтан бүгінгі күні мың жылдан астам уақыттан бері қазақ топырағына тамыры терең таралған исламның шынайы құндылықтарын Сіздермен бөлісу, мемлекетіміздің дін саласындағы ұстанған бағытын көпшілік қауымға жеткізу, тұрғындарымыздың діни қажеттіліктерін анықтау, діндарларымыздың діни ғибадаттарын еркін атқаруына қажетті шарттарды айқындауына көмектесу және ислам діні туралы дұрыс ақпарат алу бағытындағы жұмыстарға өз үлесімді қоса алсам, өзімнің егеменді еліміздің алдындағы азаматтық парызымды өтегенімді білдіреді.
Көкейлеріңізде жүрген сұрақтарға толыққанды жауап беруге маңдай терімді төгіп жұмыс жасауға дайынмын.