"Қасиетті рамазан айының алғашқы күнінен бастап Маңғыстау облыстық орталық мешітінде күнделікті тұрақты түрде ауызашар беріліп келеді. Рамазанның үшінші күнгі ауызашары облыстағы зиялы қауым өкілдеріне арналды" деп хабарлайды облыстық орталық мешіттің баспасөз қызметі. Белгілі ақын жазушылар мен елге еңбегі сіңген қайраткерлердің басын қосқан ауызашар кеші әсерлі өткен. Танымал өлкетанушы, «Балдағы алтын ақ болат», «Адай тарихы сыр шертеді» кітаптарының авторы Бектұр Төлеуғалиев, қадірлі ардагерлердің бірі, жазушы Дүйсенбі Әріпов, белгілі жазушы Әбілқайыр Спан, «Маңғыстау тарихы» кітабының авторы Алқажан Еділхан, желтоқсан көтерілісінің қаһарманы Айша Тұяқбайқызы, жыршы термешілер Амандық Көмеков пен Қамбар Оразов және мешіт ақсақалдары қонақ болған ауызашар дастарханының басында имандылық пен ізгілікті өзек еткен әдемі әңгіме өрбіді.
E-islam.kz
