Ораза тұту Исламнан бұрын Яһуди және Христиан дiндерiнде парыз құлшылықтардың бiрi болатын. Бiрақ, Ислам дiнiндегi ораза тұтуда бiршама өзгешелiктер болды. Яһуди және Христиан дiндерi бойынша таң сәресiнде ауыз бекiтiлмейді. Сонымен бiрге, бұл дiндерде жылдың қақаған қысы мен шiлiңгiр ыстығында ораза ұсталатын және ораза ұстаудың мерзiмi мен шарттарында да бiршама ерекшелiктер бар (Имам Ғазали, Мукашафатул Кулуб. 597 б).
Ал, мұсылмандарға Рамазан айында ораза тұту хижраның екiншi жылы (622-623) жоғарыдағы аяттың нәзiл болуымен парыз болып бекiдi. Әсiлi, мұсылмандар Мекке дәуiрiнде де әрбiр айдың белгiлi бiр күндерi ораза ұстайтын. Имам Ахмад ибн Ханбалдың айтуына қарағанда хижрадан кейiн мұсылмандарға намаз оқу мен ораза тұтуда үш өзгерiс болды. Олар:
Намаздағы бiрiншi өзгерiс – Мекке дәуiрiнде мұсылмандар намазды Құдысқа қарап оқитын. Ал, Мәдинаға көшiп келгеннен кейiнгi алғашқы жылы құбыла Меккедегi қасиеттi Қағба болып өзгертiлдi.
Намаздағы екiншi өзгерiс — Мекке дәуiрiнде мұсылмандар намаз қылар шақта бiр-бiрiн дауыстап шақырып жататын. Мәдина дәуiрiнде Абдуллаһ ибн Зайд деген сахаба Пайғамбарымызға (с.а.у) келiп, Намаздан бұрын азан шақыру мен қамад келтiрудi түсiнде жасыл киiмдi адамның келiп үйреткенiн баяндайды. Пайғамбарымыз (с.а.у) бұл түстi қош көрiп, әрбiр намаздың алдында дауыстап азан шақыру мен қамад келтiрудi қабыл алды.
Намаздағы үшiншi өзгерiс — Мекке дәуiрiнде мұсылмандар намаздың тек парызын орындайтын. Ал, Мәдина дәуiрiнде мұсылмандар Пайғамбарымыздың (с.а.у) артық намаз оқитынын аңғарып, Пайғамбарымыздың (с.а.у) сүннет намазын да оқи бастады.
Ораза тұтудағы үш өзгерiске келетiн болсақ:
Бiрiншiден, мұсылмандар ораза тұту туралы жоғарыдағы аят түскенге дейiн де әрбiр айдың үш күнiнде және ашура күндерi ораза ұстайтын. Ал, Мәдина дәуiрiнде тұтас Рамазан айында ауыз бекiту парыз болып бекiдi.
Екiншiден, науқас және сапарда жүргендер мен қарттар, сондай-ақ, омырауында сәбиi бар аналар, өзге ауыз бекiткен мұсылманның ас-ауқатын берген болса, ораза тұтудың орнын толтырған болып есептелдi.
Үшiншiден, мұсылмандарға ауыз ашып болғаннан кейiн жұбайларына жақындауға рұқсат берiлдi (Ибн Кәсир, Тәфсир. I т. 142-143 б).
Осылайша көш реформасының екiншi жылынан (624 ж.) бастап әрбiр жылы Алла ризашылығы үшiн Рамазан айында ауыз бекiту мұсылман қауымға үрдiс болып бекiдi.
