Тарихта Иә, тарихтаӘбу Нажиб Сухраберди (1097 – 1168) және Әбу Хафс Омар Сухраберди (1144-1234) атты екі шейх өмір сүрген. Бұл екеуі бір-біріне немере туыс болып келеді. Осының алғашқысы Қ.А.Ясауи бабамыздың ұстазы болуы мүмкін. Бірақ, ол туралы нақты дерек жоқтың қасы. Ал, Әбу Хафс Омар Сухрабердидің өмір сүрген уақытына қарап, оны Қ.А.Ясауиге ұстаз болды деп айту қиын. Әсілі, Сухраберди атты сопылық тариқатты Әбу Нажиб Сухраберди негізін салған. Ол атақты Имам Ғазалидің (1058-1111 ж) шәкірті еді. Десе де, Сухраберди тариқатының қанат жаюына Әбу Хафс Омар Сухраберди көбірек еңбек сіңірді. Ол сопылық ілімді немере ағасы Әбу Нажиб Сухрабердидің Бағдаттағы ханакасында жүріп үйренген еді. Сухраберди тариқаты өзінің силсиласын былайша таратады:
- Мұхаммед (с.а.у)
- Әли ибн Әбу Тәлип
- Убейс ибн Әмір Қарани
- Муса ибн Язид Рай
- Ибрахим ибн Әдһам
- Шақиқ Балхи
- Әбу Әмір әл-Истаһури
- Әбу Жағфар әл-Хаддад
- Жунед Бағдади
10. Мимшад Динавери
11. Ахмет Динавери
12. Мұхаммед әл-Бакри
13. Кади Уажиһиддин
14. Әбу Хамид Ғазали
15. Әбу Нажиб Сухраберди
16. Әбу Хафс Омар Сухраберди
Сухраберди тариқаты негізінен Шафий мәзһабы қанат жайған өлкелерге таралған. Аббаси мемлекетінің халифасы ән-Насыр тариқат басшысы Әбу Хафс Омар Сухрабердиді ерекше құрметке бөлейді. Халифа ән-Насыр Анатолиядағы «Аһи» қауымдастығын өзіне қарату үшін Әбу Хафс Омар Сухрабердиді дипломат етіп жібереді. Тіпті, оның ән-Насырдың елшісі болып Орталық Азияға келгендігі туралы деректер де айтылады. Әбу Хафс Омар Сухраберди өз дәуіріндегі Абдулкадир Гейлани, Мұхиддин ибн Араби, ибнул Фарит және т.б. тұлғалармен тұрақты байланыс орнатып, Бағдаттағы бүкіл медреселер мен теккелерге басшылық жасаған сопылық ілімнің көшбасшыларының бірі болатын.
Әбу Хафс Омар Сухраберди «Аварифул Мариф» атты мұсылман әлеміне танымал еңбектің авторы. Сонымен бірге оның тафсир туралы да еңбектері бар. Әбу Хафс Омар қайтыс болғаннан кейін Сухраберди тариқаты Үндістан, Орталық Азия, Иран, Сирия, Анатолияға таралды. Оның «Иршад әл-Муридин» атты шығармасына Ясауия тариқатының Азизан тармағының өкілі шайхы Хұдайдат «Бахр әл-Улум» атты түсіндірме жазған. Әсілі, Қ.А.Ясауидің Сухрабердимен кездескені туралы «Насабнамадан» басқа ешқандай деректерде мәлімет айтылмайды. Бұл болжам Әбу Хафс Омар Сухрабердидің «Иршад әл Муридин» атты шығармасына түсіндірме жазған Ясауия тариқатының өкілі Хұдайдаттың «Бахр әл-Улумнің» еңбегінен кейін шыққан болуы мүмкін. Жалпы, «Бахр әл-Улум» шығармасы Сухраберди тариқатының Орталық Азияда танымал болуына мұрындық болды.