Қазақстан Мұсылмандары Діни Басқармасының (ҚМДБ) жанындағы «Халал Даму» ЖШС Елімізде жұмыс жасап жатқан 32 «KFC» мекемелерін биылғы 2016 жылдың басында толық сараптама жұмыстарынан өткізген болатын.
ҚМДБ Халал өнімдерін стандарттау бөлімінің мәлімдеуінше «KFC» мекемелерінде ыстық тамақ, ыстық сусын, гарнир, десерт әзірлеуде қолданылатын барлық өнімдер мен қоспалар гендік молекулярлық зертханалық тексерістен өтіп, оң нәтиже көрсетті. Мәселен: Қоспалардың құрамында доңыз ДНҚ-сы анықталмады, құрамында ГМО-сы жоқ сапалы ұн ғана қолданылады.
ҚМДБ-ның Халал сертификаты қандайда бір өнімнің түрін немесе қандайда бір сауда белгісін жалпылама халал екендігін білдірмейді. Халал сертификаты тек қана шариғат ережелерін қабылдап, келісім шартқа отырған, сараптамадан дұрыс нәтиже көрсеткен, санитарлық, шариғат талаптарына жауап берген, жүйелі түрде бақылауға алынған жеке кәсіпорындар мен мекемелердің өнімдеріне ғана беріледі. Осы тұрғыдан келгенде қызметі «Халал» талаптарына сай болуына және олардың азық-түліктері бір сенімді көзден алынуына байланысты ҚМДБ Халал сертификатын Қазақстандағы «KFC» мекемелеріне беріп отыр. Бұл сертификат өзге елдердегі «KFC» мекемелерінің жұмысына жауап бермейді. Себебі, ол жерлерде тағам әзірлеуде қолданылып жатқан қоспалар түрлері беймәлім. Сол сияқты, өзге елдердегі «KFC» мекемелердің Қазақстандағы «KFC» мекемелеріне ешқандай қатысы жоқ.
Мұсылман тұтынушылары Қазақстандағы «KFC» мекемелерінде әзірленетін тауық еті АҚШ-тан келеді деген жаңсақ пікірлерін жиі айтып жатады. Қазақстандағы «KFC» мекемелері "Ресей Муфтиятының Кеңесімен" мақұлданған, "Халал" сертификатын алған "Белая птица" құс фабрикасының етін алады. Яғни, шариғат әдебіне сай бауыздалған құстың еті ғана қолданылады.
Сонымен қатар, Еліміздің «KFC» мекемелерінде қызмет етіп жатқан қызметкерлердің барлығы да ҚМДБ «Халал Даму» ЖШС-ның арнайы оқу семинарына қатысып, білім алған, халал ережелерімен танысқан. Қызметкерлеріне түсіндірме жұмыстары жүргізілген. Бұл оқыту бағдарламасы Қазақстандағы барлық «KFC» орындарында жүзеге асты.
ҚМДБ-ның «Халал» сертификатын алған «KFC» мекемелері мен басқа да кәсіпорындары ай сайын Бас мүфтидің бұйрығымен тұрақты түрде тексеріледі. Азық-түліктері мен сақталатын қоймалары да тексеріліп тұрады.