Тәуелсіздікке қол жеткізген алғашқы жылдардан бастап көп ұлтты республикамыздағы татулық пен келісімді дамытып, ел қауіпсіздігі мен бейбітшілігін қорғау, этносаралық және конфессияаралық тұрақтылық пен ынтымақты, келісім мен тыныштықты сақтау ісіне жіті көңіл бөлініп келеді. Сондықтан болар, сенімі мен көзқарасы әралуан ұлт пен ұлыс өкілдері тату-тәтті, берекелі бірлікте өмір сүруде. Еліміздегі бұл жағдайды әлемге танылған мемлекеттер этникалық үйлесімдіктің қазақстандық үлгісі деп жоғары бағалады.
Бір шаңырақ астында
Елбасының биылғы Жолдауының мәні де, мазмұны да ерекше болды. «Қазақстан-2050» Стратегиясы: қалыптасқан мемлекеттің жаңа саяси бағыты» атты елімізді дамытудың 2050 жылға дейінгі сындарлы бағдарламасында Қазақстан ХХІ ғасырдың ортасына қарай әлемнің ең дамыған 30 елінің қатарында болуға тиіс деп, басты мақсаттарымызды белгілеп берді.
Бүгінде тілі мен ділі, діні мен салт-дәстүрі әртүрлі көп ұлттардың бір шаңырақ аясында тату тәтті өмір сүруі – ел бірлігінің айғағы. Ынтымақ пен достықты қадірлеп, татулық салтын ту еткен бейбіт халқымыз осы уақыт аралығында шексіз табыстарға қол жеткізіп қана қоймай, небір ұлттар мен ұлыстардың басын қосты. Президент мемлекетіміздің тұрақты әрі қарқынды дамуы оңтайлы саясат пен осы бірліктің арқасы екенін айтып, ұлттар достығының тамыры терең, тіні берік боларына үлкен сенім білдірді.
Қазақстандағы ауызбіршілік пен келісімнің, тұрақтылық пен тыныштықтың шаңырағы – Қазақстан халқы ассамблеясы қазіргі күні этносаралық қарым-қатынасты дамытудың іргелі институтына айнала білді. Құрылған күннен бастап демократиялық қоғамның негізін қалаушы құндылықтарды дамытып келеді. Жалпы, елімізде 800-ден астам этномәдени бiрлестiк құрылса, оның отызға жуығы республикалық дәрежедегi ұйым болып саналады. Елордада құрылған 28 этномәдени бірлестік республикамызды мекендейтін ұлттардың салт-дәстүрлері мен тарихын және мәдениетін насихаттап келеді. Жас ұрпақты тағаттылыққа және ұлтаралық ынтымаққа тәрбиелеу ісінде неміс, поляк, корей, татар-башқұрт, украин, шешен-ингуш, қырғыз, әзербайжан, армян және т.б ұлттардың жексенбілік мектептерінің маңызы зор. Тiлi мен мәдениетiн дамыту мүмкiндiгіне ие болып отырған өзге ұлт өкілдері өз кезегінде қазақ халқының мәдениетіне, тарихына ықылас танытуда. Айталық, ұлттық мәселенiң өзектiсi тiл десек, мемлекеттiк тiлге ерекше қолдау танытып, шын ниетiмен үйреніп жүрген ұлт өкiлдерi Астанада жиі кездеседі. Бүгiнде кез келген бiрлестiк қазақ тiлiнiң қажеттiлiгiн түсiнедi. Құрылғанына 15-20 жыл болған этномәдени бiрлестiктердiң iшiнде қазақ тілінде еркін сөйлейтіндер жетіп артылады. Бұл ретте Астана қаласы Қазақстан халқы ассамблеясы этномәдени бiрлестiктердiң ынтымағын нығайтып қана қоймай, жүктелген міндеттерге барынша жауаптылық танытып келеді.
Қоғамдық келісім негізі
Күні кеше Бейбітшілік және келісім сарайында өткен Қазақстан халқы ассамблеясының ХХ сессиясында Елбасы Нұрсұлтан Назарбаев алқалы жиынның ең басты міндеті – еліміздегі қоғамдық келісім деп атады. «Қазақстандағы қоғамдық келісім, ең алдымен, қазақтың келісімі екенін мықтап есте ұстаған абзал. Татулық пен тұрақтылық ел иесі ретінде ең алдымен қазаққа керек. Қазақтың ынтымағы мен бірлігі мықты болмайынша, мемлекеттің тұтастық келбетін сақтау мүмкін емес. Халқымыз «тар жерде табысқан, кең жерде келіседі» демейтін бе еді?! Ең тар замандарда қазақ құшағына алған өзге этнос өкілдері бүгінде өз бауырларымыз атанып, бізбен бір халыққа айналды» дей келе, қазіргі заманғы қазақтар ата-баба дәстүрлерін ұстана отырып, бірліктің, толеранттылық пен патриотизмнің, мемлекет пен қоғамға қалтқысыз қызмет етудің үлгісін көрсетуі тиіс екенін атап өтті. Осы сессия соңында қабылданған үндеу Ассамблеяны одан әрі қоғамдық келісім, жауапкершілік пен ұлттық патриотизм ордасына айналдыруға шақырды. Өйткені, ұрпақтан ұрпаққа ауысып келе жатқан дәстүр мен сабақтастық арқылы қоғамдағы ауызбіршілік пен тұрақтылықты нығайту – елімізді өркендету жолындағы басты қызмет.
30.04.2022
