ناۋرىزباي قاجى تاعان ۇلى، قمدب نايب ٴمۇفتيى: كونستيتۋسيا – تاۋەلسىزدىك تىرەگى

دۇيسەنبى، 29.08.2016
Наурызбай қажы ТАҒАНҰЛЫ, ҚМДБ наиб мүфтиі: Конституция – Тәуелсіздік тірегі

قۇرمەتتى وتانداستار، ارداقتى اعايىندار. سىزدەردى ەلىمىزدىڭ مەرەيلى مەرەكەسى – كونستيتۋسيا كۇنىمەن شىن جۇرەكتەن قۇتتىقتايمىن.

اتا زاڭىمىز – ەل دامۋى مەن كوركەيۋىنىڭ بىردەن ٴبىر نەگىزى. مەملەكەتىمىزدىڭ تۇعىرلى قاعيداتتارى بۇگىندە ٴوزىنىڭ ومىرشەڭدىگىمەن بيىك بەلەسكە جەتىپ وتىر. قازاق ەلىنىڭ حالىقارالىق قاۋىمداستىقتار الدىندا مارتەبەلى ورىن الىپ، مەرەيىنىڭ ۇستەم بولۋى وسىنىڭ ايقىن ايعاعى. ەلباسىمىز نۇرسۇلتان نازاربايەۆ ٴوز سوزىندە: «كونستيتۋسيا ٴبىزدىڭ تاۋەلسىزدىگىمىزدى نىعايتىپ، مەملەكەت پەن جالپى قوعامدا مىزعىماس تۇراقتىلىقتى قالىپتاستىردى» دەپ اتاپ وتكەن دە ەدى.

وسىدان جيىرما ٴبىر جىل بۇرىن 30 تامىز كۇنى ەلىمىزدە تاريحي شەشىم قابىلدانىپ، كونستيتۋسيامىز بەكىتىلدى. وسى كەزەڭ ىشىندە اتا زاڭىمىز زاماننىڭ تالابى مەن وركەنيەتتىڭ كوشىندە ٴوز بيىگىنەن كورىنە بىلگەنىنە بارشا حالىقتىڭ ٴھام الەم ەلدەرىنىڭ ٴوزى كۋا.

كەز كەلگەن مەملەكەتتىڭ ۇستا­نىمىن، ۇلتىنىڭ قۇندىلىعىن ايقىندايتىن نەگىزگى قۇجات – كونستيتۋسيا. وسى جيىرما ٴبىر جىل ىشىندە اتا زاڭىمىزدىڭ ارقاسىندا قۇقىقتىق مەملەكەت ورناپ، وركەنيەتتى ەلدەرمەن جان-جاقتى قارىم-قاتىناس قالىپتاستى. سان قىرلى رەفورمالار جاسالىپ، دەموكراتيا پرينسيپتەرى كوتەرىلىپ، كونستيتۋسيا اياسىندا اۋقىمدى ىستەر اتقارىلدى.

اتا زاڭىمىز ٴار ادامنىڭ ٴدىني نانىم-سەنىم بوستاندىعىنا كەپىلدىك بەردى. وسىنىڭ ارقاسىندا تاريحي قۇندىلىقتارىمىز قايتا ورالىپ، وشكەنىمىز قايتا جاڭعىردى. جەر-جەردە كۇمبەزى كوكپەن تالاسقان مۇنارالى مەشىتتەرىمىز كوبەيىپ، ىرگەلى ٴدىني وقۋ ورىندارى اشىلدى. ٴداستۇرلى دىنگە دەمەۋ بولارلىق ىستەر قاتارى ٴاليمساقتان مۇسىلمان قازاق حالقىنىڭ قۇربان ايت مەرەكەسىن مەملەكەتتىك دەڭگەيدە تويلاناتىن مەيرام رەتىندە مارتەبەسىن كوتەرۋىمەن تولىقتى. اتا زاڭىمىزدىڭ ٴداستۇرلى دىنگە جاساعان قامقورلىعى، كورسەتكەن قۇرمەتى ەرەكشە ەكەنىن اتاپ وتكەنىمىز ٴجون.

بۇگىندە قازاق ەلى سان ۇلتتاردىڭ باسىن ٴبىر شاڭىراق استىندا بىرىكتىردى. ۇلتارالىق دوستىق مەن قوعامدىق كەلىسىمدى نىعايتتى. الەمنىڭ تۇكپىر-تۇكپىرىندە قارۋلى قاقتىعىستار ورىن الىپ، تەرروريزم مەن ەكسترەميزمنىڭ سالدارىنان كوپتەگەن ەلدىڭ ىشكى تۇتاستىعىنا سىنا قاعىلىپ، بىرلىگىنەن اجىراپ جاتقانىن كورىپ وتىرمىز. وسىنداي اق پەن قارا الماسقان ۋاقىتتا تاۋەلسىز قازاقستاننىڭ ىنتىماق-ىرىسى، باق-بەرەكەسى ارتىپ، تۇراقتىلىق پەن تىنىشتىقتىڭ ۇستىندە كۇن كەشۋدەمىز. مۇنىڭ بارلىعى اۋەلى حاق جاببار اللا تاعالانىڭ ەلىمىزگە دەگەن مەيىرىم-ماحابباتى بولسا، ونان سوڭ ەل باسقارعان ازاماتتاردىڭ، ەلباسىمىز باستاعان ۇلتىن سۇيگەن، مەملەكەتشىل جانداردىڭ جان ايانباي ەتكەن ەڭبەگىنىڭ جەمىسى. سونداي-اق، اتا زاڭىنا مويىنسۇنعان ەلدىڭ بىرلىگى مەن ىنتىماعىنىڭ ارقاسى بولسا كەرەك.

قازاقستان رەسپۋبليكاسىنىڭ كوستيتۋسياسىنىڭ: «ٴبىز ورتاق تاريحي تاعدىر بىرىكتىرگەن قازاقستان حالقى...» دەپ باستالادى. ٴبىز بەنەن ٴسىزدىڭ ماقساتىمىز – وسى تاۋەلسىزدىكتىڭ شىن باعاسىنا جەتىپ، بارىمىزدى باعالاپ، قۇرمەتتەي ٴبىلۋ. ەلىمىزدىڭ وسىپ-وركەندەۋىنە ۇلەس قوسۋ.

ٴاربىر قازاقستاندىق كەلەشەككە كەرۋەن تارتقان مەملەكەتىمىزدىڭ تۇراقتى دامۋىنىڭ كەپىلى كونستيتۋسيانىڭ مەملەكەت پەن قوعام ٴۇشىن عانا ەمەس، ٴوزىنىڭ جەكە باسى مەن وتباسى ٴۇشىن دە ماڭىزدىلىعىن تەرەڭ سەزىنەدى.

ەل ٴۇشىن ماڭىزدى قۇندىلىقتارىمىز – تاۋەلسىزدىگىمىز، كەلىسىم مەن بىرلىگىمىز نىعايا بەرسىن. ٴار شاڭىراققا قۇت-بەرەكە، ىرىس پەن ىنتىماق تىلەيمىن. ەل ىرگەسى امان، كەلەشەگىمىز كەمەل بولعاي!

وقىلدى 1294 رەت
joomshaper
top